کوردپارێز/ ڕه‌جه‌ب ته‌یب ئه‌ردۆغان سه‌رۆک کۆماری تورکیا ڕایگه‌یاند: ئه‌نقه‌ره لیستێکی ڕاده‌ستی واشنتۆن کردووه که تێدا ناوی ۱۸۰۰ که‌س له به‌رهه‌ڵستکاری سووری هاتووه و ئه‌وان ئاماده‌ن بۆ به‌ره‌نگاریی داعش له باکووری سووریا.
به گوێره‌ی ئه‌م ڕاپۆپرته، ئه‌ردۆغان که له باڵوێزخانه‌ی تورکیا له واشنتۆن کۆنفڕانسی ڕۆژنامه‌وانی به‌ڕێوه‌ده‌برد، وتی:بۆ به‌ره‌نگاریی داعش له سووریا تا ئێستا ناوی ۱۸۰۰ که‌سمان داوه‌ته ئه‌مریکا و له داهاتووشدا ناوی ۶۰۰ که‌سی دیکه ڕاده‌ست ده‌که‌ین که پێکدێن له عه‌ره‌ب و تورکمان.
سه‌رۆک کۆماری تورکیا ڕایگه‌یاند که نوێنه‌رانی ده‌وڵه‌تی ئه‌مریکا له دانوستانه‌کانیاندا جه‌ختیان کردووه که ڕێگه‌ناده‌ن به پێکهاتنی ناوچه‌یه‌کی کوردنشین له سووریا.
وتیشی: ئه‌گه‌ر ناوچه‌یه‌کی وا له باکووری سووریا دروست ببێت، ئه‌نقه‌ره کاردانه‌وه‌ی ده‌بێت و ئه‌مه به‌رپرسیارێتی ئێمه‌یه که ڕێگری بکه‌ین له پێکهاتنی ناوچه‌یه‌کی کوردنشین له باکووری سووریا.