ئاسۆ حاجی
PYD ویستی بە بەردێک دوو چۆلەکە راوبکات بە نمایشکردنی سیناریۆیەکی پێش وەختە بڕیار لە سەر دراو، یەکەمیان بۆ کەمکردنەوەی فشاری ناوخۆیی شەقامی کوردی کە بەردەوام چاویان لەسەر پەیوەندیەکانی نێوان رژێمی بەعس و پەیەدە بوو، رەنگە ئەوە بۆ ماوەیەک گومانەکەی لەلایەن بەشێکی خەڵک لە سەر ) PYD) بڕەوێتەوە بە تایبەتی ئەندام و لایەنگرانی خۆیان کە ئەوانیش وەک خەڵکی دیکە رەخنەیان لەو پەیوەندیەی حزبەکەیان دەگرت بە تایبەتیش دوای بڵاوبوونەوەی چاوپێکەوتنەکەی پارێزگاری حەسەکە کە تێیدا بە راشکاوی باس لە پەیوەندی نێوان (PYD) و رژێمی بەشار ئەسەد دەکات بە تایبەتی پەیوەندی ئەو لەگەڵ هەریەک لە ئەردال خەلیل و رێدور خەلیل دەلێ”من و رێدور سەرکردایەتی شەڕەکانمان دەکرد” .
دووەمیان کە مەبەستە بنچینەیەکەی لە پشتەوە بووە دەربازکردنی (PYD) یە لەو هەلوێستەی تێیکەوتووە لە بەشداری پێنەکردنی لە هیچ یەک لە دانوستانەکانی نێوان رژێمی سوریا و ئۆپۆزسیۆنی ئەو وڵاتە،بەو بیانووەی کە PYD بەشێکە لە رژێمی بەشار ئەسەد،بە هەبوونی چەند هەزار سەربازێکی سوریا لە ناو فڕۆکەخانەی قامشلو،هەروەها هیزێکی دیکەی هاوشێوە لە “چوارگۆشەی ئەمنی” لەگەڵ هەبوونی دەیان چەکداری دیکەی عەشایری عەرەبی لە ناو قامشلو لە ژێر ناوی ( دیفاع وەتەنی) PYD توانی بە شەڕێکی چەند سەعاتی ئاڵۆزیەک دروست بکات و وەک سەرکەوتوو لە شەڕەکە دەرچێت،هەر دوای ئەوەش یەکسەر شاندێکی هەمەلایەنەی بگاتە قامشلو و یەکسەر ئاگربەست رابگەیەندرێ،هەموو ئەو رووداوە یەک لەدوای یەکانە بۆ ئەوەمان دەبەن کە ئامانج لە شەڕەکە نیشاندانی رووێکی نوێی PYD نیشانی ناوخۆ و دەرەوە بدات،کە دوژمنی رژێمی بەسار ئەسەدە ئەوەش ببێتە پشتگیریەک بۆ ئەوەی بەشداری لە دانیشتنەکانی “جنێڤ” پێبکرێ،کە لایەنه کان بۆ دوا جار کەلک لە خزمەتەکانی PYD وەربگرن،لەوەی دەنگێکیان لە ناو ئۆپۆزسیۆن هەبێت کە هاوئاهەنگ بێت لەگەڵ کارنامەی حکومەتی سوریا بە تایبەتی بە مانەوەی بەشار ئەسەد و پێکهێنانی حکومەتی بنکە فراوان بە سەرۆکایەتی ئەو،رژێمی بەشار ئەسەد کە چەند هەفتەیەک بەر لە ئێستا عەشیرەتە عەرەبەکانی دەوروبەری قامشلوی چەکدار کردووە PYD دەبوایە ئەو کات ئەوە قبوڵ نەکا، یان چەند رۆژێک بەر لە ئێستا کە هەڵبژاردنەکانی پەرلەمانی لە سوریا بەڕێوەچوون دەبوایە ئەو شەڕە لە سەر ئەوە بوایە،ئێستا PYD بە تەنیا شەڕ دەکا و بە تەنیاش ئاگربەست رادەگەیەنێ، هاوکات لەگەڵ ئەوە میدیای PKK و هاوڕێیانیان دەست بە بانگەشەی نزیک بوونی ئەگەری قبوڵکردنی شاندی PYD دەکەن لە کۆبوونەوەکانی جنێڤ.
مەرجەکانی PYD بۆ رێکەوتن لەگەڵ رژێم وەک ئەوەیە بە هەماهەنگی هەردوولا نوسرابێت، چونکە تەنانەت یەک خاڵیشی تێدا نیە حکومەت بڵێ نا تەنها چەک کردنی عەشایری عەرەبی نەبێت کە رەنگە ئەوەش لەبەرچاوی خەڵک بە نیوەچلی جێبەجێ بکات، خاڵەکانی دیکەش هەر لە سەرەتاوە حکومەت لەسەریان رازیە، چونکە موچەی هیچ فەرمانبەرێکی نەبڕیوە و هیچ کوردێکیشی لە ژێر دەسەڵاتی PYD دەستگیر نەکردووە مەگەر نەیارانی PYD بووبن.
